Bugun, 30-sentabrda, 8- Yevropa kinofestivalining ochilishi marosimi bo‘lib o‘tdi. Tadbir doirasida 54- xalqaro kinofestival hay'atining maxsus mukofoti laureati – “Mening fikrlarim jim” filmining namoyishi o‘tkazildi. Rejissyor – Antonio Lukich.
Festival namoyishlari Toshkentdagi “Yulduz” kinoteatrida 1-oktyabrdan boshlab va Buxorodagi “Buxoro” kinoteatrida 3-oktabrdan e'tiboran o‘tkaziladi. Kirish tekin. Yevropa kinofestivali ”Эpak yo‘li durdonasi” Toshkent xalqaro kinofestivali doirasida tashkil etildi.
“Biz mamnuniyat bilan O‘zbekistondagi 8- Yevropa kinofestivalini ochmoqdamiz. Bu yilgi Festival muhim voqyea bilan tarixga kiradi – Yevropa kinofestivali Toshkent xalqaro kinofestivalining uzviy qismiga aylandi. Biz Kinematografiya agentligiga ushbu ahamiyatli madaniy tadbirni tashkil etishdagi bebaho hamkorligi uchun minnatdorchilik bildiramiz.
Uzoq yillar davomida Yevropa Ittifoqi madaniyatlar almashinuvini qo‘llab-quvvatlamoqda va O‘zbekiston aholisi uchun Yevropa madaniyatiga, jumladan kinematografiyasiga keng yo‘l ochmoqda. Global pandemiya muayyan vaqt davomida jarayonlarni izdan chiqardi va biz bugun ekranlarga YIning eng yaxshi filmlari qaytganini ko‘rishdan mamnunmiz.
15 ta kartinaning barchasi, YIning shimolida – Finlyandiyada suratga olingan “Uyqudagi devlar haqidagi ertak”dan tortib, to YIning janubida – Portugaliyada ishlangan “Bobomning shaytonlari”gacha, chegaralar va tillar doirasidan chetga chiquvchi turfa janrlar bo‘yicha qiziqarli sayohatni taklif etadi. Ular bizni inson tajribasi xazinasiga sho‘ng‘ishga chaqiradi va har bir tomoshabinga ajoyib kinematografik sayohatni va'da qiladi”- dedi Yevropa Ittifoqining O‘zbekistondagi elchisi Sharlotta Adrian.
Kinofestival ochilishida EU-FOCUS FILM CAMP ishtirokchilariga kurslarni muvaffaqiyatli yakunlaganlari to‘g‘risida sertifikatlar topshirildi. EU-FOCUS FILM CAMP o‘smirlar uchun ta'lim loyihasi joriy yil boshida FOCUS kino va teatr maktabi tomonidan Yevropa Ittifoqining moliyaviy ko‘magida yo‘ga qo‘yilgan. Ta'lim bepul bo‘ldi va ko‘p tomonlama nazariy tayyorlovni, mahorat darslari, filmlar tomoshasini, milliy va xorijiy mutaxassislar bilan uchrashuvlarni, suratga olish amaliyotini o‘z ichiga oldi.
“Bu yil Yevropa kinofestivali birinchi marta Toshkent xalqaro kinofestivalining bir qismi sifatida o‘tmoqda. O‘zbekistondagi Yevropa Ittifoqi delegatsiyasidan tashqari, Kann kinofestivali sovrindori bo‘lgan “Qulash anatomiyasi” filmini taqdim etgani uchun Fransiya elchixonasiga ham minnatdorchilik bildirmoqchiman. Bu kartina Toshkent kinofestivalini ochib beradi. Festival davomida o‘zbek kinoijodkorlari Francais instituti vakillariga o‘z asarlarini taqdim etish imkoniyatiga ega bo‘ladi. Shuningdek, italyan liboslari ko‘rgazmasini tashkil etishda Italiya elchixonasining ko‘magini ham qayd etib o‘tmoqchiman.
Hamkorlikda kino suratga olish, jumladan ishchi nomi “Vamberi” bo‘lgan qo‘shma loyiha ustida ishlash to‘g‘risidagi memorandumlarning imzolanishi muhim voqea bo‘ladi. Biz uni Vengriya milliy kino instituti ko‘magida amalga oshiramiz,”- deya, fikr bildirdi Kinematografiya agentligi bosh direktori Firdavs Abduxoliqov.
Shuningdek, Toshkentdagi Yevropa kinofestivali doirasida «Egole Cachalot» jamoasining konserti o‘tkaziladi. Fransiyalik ijrochi David Delabros, musiqa muxlisi bo‘lgan kashalot nomidan, o‘ynoqi va erkin shaklda bolalarni murakkab dunyoimiz: ekologiya, ijtimoiy tengsizlik, bola oila va jamiyatda duch keladigan qiyinchiliklar bilan tanishtiradi. Konsert Kinematografchilar uyida 2-oktyabrda o‘tkaziladi. Kirish erkin.