"Ipak yo'li durdonasi" XV Toshkent Xalqaro kinofestivali doirasida "Taksi" filmida bosh rolni (Daniel) ijro etgan taniqli aktyor Sami Naseri ishtirokida bugun, 1-oktyabr kuni "Renessance" kinochilar uyida yosh va bo'lajak kinoijodkorlar uchun mahorat darsi bo'lib o'tdi. Bu master klass ham Frederik Diefental bilan bo'lgan master klass kabi yengil hazil-mutoyibalar bilan boshlandi.
Jumladan u: " Men ham hamkasbim Frederik Diefental kabi raqsga tushib berishim mumkin,"- deb, tadbir oxirida aytgan gapining ustidan ham chiqdi, ya'ni "Taksi" filmidagi mashhur musiqalardan biriga raqs tushib berdi.
Bundan tashqari Sami Naseri siyosat bilan qiziqmasligini va agar beriladigan taklif yoqsa, davlat tanlamasdan rol ijro etishini aytib, quyidagi fikrlarni alohida ta'kidlab otdi: " Men uchun siyosatni qizig'i yo'q, men shunchaki oddiy insonlar uchun kinoda suratga tushaman. Masalan hozir Fransiya va Jazoir o'rtasida hamkorlikda suratga olinayotgan mustamlakachilik haqidagi bir katta filmda rol o‘ynayapman."
Shuningdek u "Taksi" filmida rol ijro etgan qolgan aktyorlar bilan tadbirlarda va boshqa marosimlarda uchrashib turishini, Emilien rolini ijro etgan Frederik Diefental bilan esa doimo aloqada ekanligi aytib berdi. Bu ikkilik hozir o'z prodyuserlik firmasini yuritadi va bir-biridan qiziqarli filmlar ustida ishlashmoqda.
Undan nega "Taksi" filmining 5-qismida o'ynamagani haqida savol so‘ralganda, u shunday javob berdi: "Bu qismning ssenariysi menga ham do'stim "Emilien"ga ham ma'qul kelmadi, keyin u yerda umuman boshqa jamoa ishladi va bizga umuman u muhit yoqmadi. Ammo eski jamoadoshlarimiz (rejissyor, aktyorlar, prodyuser, bastakor) ishtirok etsa va film falsafasi bizga yoqsa, men ham Frederik ham 6-qismda albatta rol o‘ynaymiz."
Master klass so'ngida u muxlislarni qiziqtirgan barcha savollarga atroflicha javoblar berib o'tdi. Sami Naseri ertaga Toshkent Xalqaro kinofestivalining yopilish marosimi bo'lib o'tadigan Samarqand shahrida bo'ladi.
