Bo‘lib o'tgan master klassda ular muvaffaqiyatli filmlar qanday tasvirga olinishi, ularga qanday va qancha mablag' ajratish kerakligi haqida o'z fikrlarini bildirib o'tdi. Yakub Skochenning aytishicha, kichikroq mablag' bilan ham muvaffaqiyatli filmlar olish mumkin va, asosiysi, pulni to'g'ri, ya'ni o'z o'rnida sarflash lozim.
Oxirgi paytlarda Polsha filmlari "Oskar" kinomukofotini qo'lga kiritayotgani va bunday yuksak natija uchun nimalarga e'tibor berish kerakligi bo'yicha ham polshalik mutaxassislar tomonidan batafsil ma'lumotlar berildi.
Rejissyor, shuningdek, agar Polsha kino mutaxassislari bilan hamkorlikda film olish rejasi O'zbekiston kinoijodkorlarida bo'lsa, bunga tayyor ekanligi va agar loyihaga Polsha mutaxassislari jalb qilinsa, film xarajatlarining 30% O'zbekistonga qaytarib berilishini ham aytib o'tdi.
Yakub Skochen filmlarini suratga olish uchun TV shoularda qatnashib pul topishini va bu pullarning barchasini o'z ijodi ravnaqi yo'lida tikishini bildirdi.
Ijodkor o'zining kommunistik davr haqidagi filmlari bilan ham ancha dovrug‘ qozongan. Polsha 2004-yilda qiyinchiliklar bilan Yevropa Ittifoqiga a'zo bo'lgan va bu Polsha mustaqilligining eng katta yutuqlaridan biri sanalganligi uchun Yakub Skochen mustaqillikni madh etuvchi filmar ham olishini bildirdi.
Polsha filmlarida suratga tushish uchun nomzodlar polyak tilini bilishi kerakligi va agar kastingda qatnashuvchi tilni bilmasa, qanday darajadagi aktyor yoki aktrisa bo'lishidan qat'iy nazar, unga juda kichik rollar berilishi haqidagi yangilik ham ko'pchilikni qiziqtirib qo'ydi.
Shuningdek, aktrisa Natalya Pitri horror janridagi "Apokaviksa" filmida suratga tushgani va bu jarayonda turli qiyinchiliklarga duch kelgani, shu jumladan, film asosan tunda olingani sababli kechasi bilan ishlagani, sovuq havo va sovuq suv bilan sahnalar ko'p bo'lgani, juda ko'p jismoniy kuch talab qilgani va boshqa murakkabliklar borasida ham atroflicha ma'lumotlar berib, har qanday aktrisa agar rostdan o'z kasbini chin dildan sevsa, bunday qiyinchiliklarga bardosh berish kerakligini alohida ta'kidladi.
Master klass so'ngida polshalik kinoijodkorlar talaba yoshlarni qiziqtirgan barcha savollarga javob berib o'tishdi.
