MDH mamlakatlarida kino rivoji istiqbollari muhokama qilindi

Yangi “Renessans” kinor uyida XV Toshkent kinofestivali doirasida MDH mamlakatlari kinematograflari direktorlar kengashining “MDH mamlakatlarida kinematografiyani rivojlantirish istiqbollari” mavzusidagi davra suhbati bo‘lib o‘tdi.

Sammitda “MDH va Gruziya davlatlari kinostudiyalari xalqaro ijodiy uyushmasi” aʼzolari, jumladan, Oʻzbekiston Kinematografiya agentligi rahbari Firdavs Abduxoliqov, “Qozoqfilm” prezidenti Azamat Satibaldi, Qirg‘iziston Madaniyat, axborot, sport va yoshlar siyosati vazirligi qoshidagi kinematografiya departamenti direktori Aqjol Bekbolotov, “Turkmanfilm” kinostudiyasi direktori o‘rinbosari Sahisaliq Bayramov, “Tojikfilm” davlat muassasasi direktori Mahmadsaid Shoxiyon, “LenDok” kinostudiyasi direktori Aleksey Telnov, taniqli belaruslik prodyuser va kino operator Vladimir Krachevskiy, Qozog‘iston Respublikasida xizmat ko‘rsatgan artist, Qozog‘iston Kinematograflar uyushmasi raisi o‘rinbosari Kanat Torebaylar ishtirok etdi.

So‘zga chiqqanlar hamkorlikda filmlar yaratish, shuningdek, yoshlar bilan ishlashda o‘zaro hamkorlikni faollashtirish zarurligiga e’tibor qaratdilar. Xususan, Krachevskiy “Kino besh kun ichida” noyob yoshlar tanlovining muhimligini ta’kidladi va shu kabi tanlovni boshqa kinofestivallar dasturlariga kiritishni taklif qildi. “Bu kino ijodkorlar o‘rtasida aloqalarni o‘rnatilishida yordam beradi. Bu bir-birimizning muammolarimizni, bir-birimizning o‘ziga xos xususiyatlarimizni tushunishga ko‘mak beradi”, — dedi Krichevskiy.

Belaruslik kinorejissyor, shuningdek, birgalikda loyihalarni amalga oshirilayotganini, biroq ijodkorlar ko'pincha turli mamlakatlarning me'yoriy-huquqiy masalalariga duch kelishini ta'kidladi. Krachevskiy shuningdek, ssenariylarni tayyorlash va filmlar yaratishda turli mamlakatlardagi o‘ziga xos mentalitetga e’tibor berishni, tarqatish va mualliflik huquqlari haqida muammolarga e'tibor qaratishni taklif qildi.

Azamat Sotibaldi kino manfaati uchun birlashib, birgalikda harakat qilish vaqti kelganini aytdi. Qo'shma loyihalarni amalga oshirish, filmlarni turli mamlakatlarda tarqatish kerakligini, ta'kidladi va so'z so'nggida kinofestival tashkilotchilariga minnatdorchilik bildirib, barchaga omad va muvaffaqiyatlar tiladi.

Mahmadsaid Shoxiyon va Sahisaliq Bayramovlar ham tashkilotchilarga minnatdorchilik bildirib, ishtirokchilarga muvaffaqiyatlar tiladilar hamda tez orada o‘z mamlakatlarida kinofestivallar o‘tkazilishini e’lon qilishdi. Shu yilning kuzida Dushanbeda “Toji Somon” kinofestivali bo‘lib o‘tadi, 2024-yilda Ashxobodda shoir va faylasuf Magtimguli Fragining 300 yilligiga bag‘ishlangan kinofestival o‘tkazilishi rejalashtirilganini ma'lum qilishdi.
Firdavs Abduxoliqov hamkorlikdagi ishlar muhimligini ta’kidlab, yosh kinoijodkorlar tarbiyasiga e’tibor qaratishga chaqirdi.
 

“Biz kinoni yanada yaxshilash, uni tomoshabinlarimizga, xalqimizga yaqinroq qilish uchun kuchlarni birlashtirish haqida gapiryapmiz – bu bizning asosiy vazifamiz. MDH davlatlari koʻplab sohalarda hamkorlik qiladi: qoʻshma korxonalar, zavodlar, fabrikalar faoliyat koʻrsatmoqda. Kinematografiya sohasi ham bundan mustasno emas, ayniqsa, hali foydalanilmagan zaxira juda ko'p. Buni bizdan, forumda ishtirok etayotgan mas'ul shaxslardan boshqa hech kim qilmaydi. Bizning MDH davlatlari kinematografchilar uyushmasining o‘ziga xos dasturi bo‘lishi kerak. Qozog‘iston, Qirg‘iziston, Turkmanistonlik birodarlarimizni hamkorlikda faolroq ishtirok etishga chaqiramiz. Mamlakatimiz aholisining 60 foizdan ortig‘ini yoshlar tashkil etishini unutmasligimiz kerak. Va bu bizning asosiy tomoshabinimiz. Biz yosh kinoijodkorlarmizning ko'proq filmlar yaratishlariga ishonch bildirishimiz kerak. MDH davlatlaridan yoshlarni biz bilan birga o‘qishga taklif qilamiz. Bizda prezidentning kino taʼlimi toʻgʻrisidagi farmoni bor, unda boshqa narsalar qatori yoshlar kinoakademiyasi tashkil etish haqida ham soʻz bor. Bollivud universiteti bilan muzokaralar olib borilmoqda, Fransiya kino akademiyasi bilan ishlayapmiz, turkiyalik hamkasblar bilan hamkorlik qilish haqida kelishib oldik, Nyu-York kino akademiyasi bilan doimiy aloqa o‘rnatish rejalashtirilmoqda. Mamlakatlarimizda o‘tkazilayotgan kinofestivallar doirasida yoshlarga oid tadbirlarni tashkil etish zarur. Endi ularni hamkorlikda tashkil etish imkoni bor. Kelinglar, bir-birimizning mamlakatlarimizga tashrif buyuraylik va delegatsiyalarimizning kamida uchdan bir qismi yoshlardan iborat bo‘lsin. Ishonchim komilki, 10-15 yildan keyin biz hamkorlikda katta o'sishni guvohiga aylanamiz”, - dedi Abduxoliqov.

Forum yakunlari bo‘yicha Vladimir Krichevskiyni “MDH va Gruziya kinostudiyalari xalqaro ijodiy uyushmasi”ning muvofiqlashtiruvchisi va ijrochi direktori etib tayinlash to‘g‘risida qaror qabul qilindi. Shunday qilib, tashkilot ijroiya qo‘mitasi Minskda, bosh qarorgohi esa Toshkentda joylashadigan bo'ldi.