Bugun XV Toshkent xalqaro kinofestivali start oldi.
Bu yil 30dan ortiq mamlakatdan delegatsiyalar tashrif buyurdi, poytaxtda 50dan ortiq filmlar namoyish etilishi kutilmoqda. Shulardan biri – «O‘zbek qizi» filmi. Аsya Kulik rolini ijro etgan Yelizaveta Shukova ham kinofestivalga tashrif buyurib, xalqaro ahamiyatga ega voqeaga oid dastlabki taassurotlari haqida so‘zladi.
– Men bu kinofestivalda birinchi marta ishtirok etyapman, – dedi teatr va kino aktrisasi Yelizaveta Shukova. – O‘tgan yili biz «O‘zbek qizi» filmini taqdim etganmiz, biroq kelish imkoniyati bo‘lmagan edi. Bu yil shu yerda ekanimizdan benihoya xursandmiz. O‘zbekiston hayratlanarli darajada chiroyli, yorqin, milliy liboslar ham betakror. Umid qilamizki, tashrifimiz O‘zbekiston va Belarus o‘rtasidagi madaniyat aloqalarini yanada mustahkamlaydi, biz hamkorlikda yanada ko‘proq filmlar suratga olib, tomoshabinlarni xursand qilamiz. Meni iliq kutib olishgani, filmdagi rolimni eslab qolishganidan boshim ko‘kka yetdi. O‘zbekistonlik hamkasblar bilan ishlash zavqli ekanligini taʼkidlamoqchiman. Kinofestivaldan ko‘plab qiziqarli loyihalarni ko‘rish, filmimizni katta ekranda tomosha qilish, madaniyat bilan tanishib hamkorligimizni mustahkamlashni kutyapman.
XV Toshkent xalqaro kinofestivali o‘z ijodiy yo‘lini yangilaganidan so‘ng uchinchi marotaba prezident farmoniga muvofiq o‘tkazilmoqda. 1958-yilda Toshkentda birinchi Xalqaro kinofestival bo‘lib o‘tgan. 1968-yildan Osiyo, Аfrika, Lotirn Аmerikasi mamlakatlarining Toshkent xalqaro kinofestivali 1988- yilgacha ikki yilda bir marotaba muntazam ravishda o‘tkazib kelingan. 2021- yilda u qaytadan tugʼildi, umumiy hisobda u 65 yildan buyon o‘tkazilmoqda.
