Frederik Diefental haqida qisqacha ma'lumot:
Frederik Diefental 1968-yil 26-iyulda tavallud topgan. U "Taksi" filmlari seriyasidagi bosh rollardan biri - politsiya inspektori Emilien rolini ijro etgan va bosh qahramon Danielning do‘sti sifatida mashhurlikka erishgan. Frederik Diefental 15 yoshida maktabni tashlab, mehmonxonada yordamchi bo'lib ishlay boshlaydi, so'ng bir muddat sartarosh bo'lib ham ishlaydi. Uning komediyaga bo'lgan qiziqishi uni Virio teatrining aktyorlik kurslariga borishga undadi. Uning aktyorlik debyuti 1991-yilda "To'liq kuzatuv" filmida bo'lgan. Aktyor o'zining birinchi asosiy rolini esa 1995-yilda "Sweet France" (Douce France) filmida ijro etgan, ammo film katta muvaffaqiyat qozonmaydi. Frederik Diefental "Taksi", shuningdek, "Taksi-2", "Taksi-3" va "Taksi-4" filmlarida politsiyachi Emilien rolini o'ynab, katta mashhurlikka erishdi. Shuningdek, u "Eng yaxshi yosh aktyor" nominatsiyasi bo'yicha "Sezar" mukofotiga sazovor bo'lgan.
Master klass ajoyib hazillar bilan ko'tarinki ruhda boshlandi. Jumladan, u "Taksi" filmidagi axlat qutisiga tushib ketishi, mashina bilan do'kon ichiga kirib ketishi, haydovchilik guvohnomasini ololmasligi kabi kulguli sahnalar qanday suratga olingani haqida yumor bilan so'zlab berdi. Mahorat darsi davomida Frederik Diefental aktyor rolni qanday ijro etish kerakligini o'z talqinida tushuntirib berdi. Bu borada u quyidagi fikrlarni alohida ta'kidladi:
"Avvalo, ssenariy matnini o'qib, uni chuqur tahlil qilish, undan so'ng esa, miyamizda rolning suratini chizishimiz kerak. Shunchaki rolga kirishib ketish kamlik qiladi va hech qachon mukammallikka intilmaslik kerak, biz baribir insonligimizga boramiz va xato qilamiz. Eng asosiy narsa, bu kino olish jarayonidagi muhit hisoblanadi. Muhit shu darajada yaxshi bo'lishi kerakki, siz u yerda o'zingizni baxtli his qilishingiz kerak. Bu film muvaffaqiyatiga to'g'ridan-to'g'ri ta'sir qiladi".
Frederik Diefental master klass davomida "Taksi" filmi jahon kinosidagi ikkilik tandemining rivojlanishiga katta hissa qo'shganini ham ta'kidlab o'tdi. "Asteriks va Obeliks" juftiligi kabi biz ham Sami Naseri bilan o'zimiz kutmagan holda dunyoga mashhur bo'lgan ikkilik tandemini yaratib qo'ydik".
Bundan tashqari u "Taksi" filmi uchun kastingdan qanday o'tgani va bu jarayon juda ham qiziq bo'lganini so'zlab berdi: "Lyuk Besson meni kastingdan o‘tganimni aytganida stulda o'tirgan edim va bu xabarni eshitishim bilan hayajondan stuldan tushib ketganman".
Shuningdek, u O'zbekistondan taklif bo'lsa, birgalikda kino loyihalarida ishlashi mumkinligini bildirib o'tdi.
An'anaga binoan, u mahorat darsining oxirida yosh kinoijodkorlar tomonidan berilgan hamma savollarga atroflicha javob berib o'tdi.
